သေရိဝဝါဏိဇဇာတ်
(ဗောဓိသတ်ဒှ်ညးဗၞိက်လီု)
သေရိဝဝါဏိဇဇာတ် ပဟိုတ်ကဵုခမဳမသၠးဖျေံကၠေံလွဳမွဲဂှ် ကျာ်မတွံ၊၊ ပ္ဍဲကာလမတုဲတေံ နူဘဒြကဝ်ဝွံ ရိုဟ်ကလေၚ်အာတုဲ ပ္ဍဲကဝ်မရနုက်ကဵုမသုန် ပ္ဍဲရးသေရိဝ ဗောဓိသတ်ဒှ်ညးဗၞိက်လီု ထိုၚ်မစမာဲဏာပ္ဍဲ ပါၚ်ကၞက် သေရိဝဂးယၟု၊ ညးဗၞိက်လီုလုလန်မွဲသ္အာၚ် မၞုံယၟုသေရိဝကီု အာပဗၞိက် ကၠောအ်ကြုၚ်နဳဝါဟ တုဲ လုပ်အာဍုၚ်အရိဌပုရ၊၊ သြော်သဗာန်တြဴအလုံဍုၚ် ပရအ်ပ္တုပ်ပၜါစွံတုဲ အစွံသြော်သဗာန်တြဴမဒးဇ ကုဟေၚ် ဂၚေၚ်သွံဗၞိက်ရ၊၊ ညးဗၞိက်လုလန်တေံလေဝ် အစွံသြော်သဗာန်တြဴမဒးဇကုဟေၚ်ကီု ဂၚေၚ် သွံအာရ၊၊
ပ္ဍဲဍုၚ်ဂှ်တုန် သေဌဳမွဲ ကုသဵုတရေံမဟုတ်အိုတ်အာ ကလောသီုပိုန်ဒြပ် ဗဗွဲလၟေၚ်အိုတ်အာတုဲ ဆစဴဗြဴမွဲ ကဵုသမ္ဘာသေဌဳမွဲမသှ်ေရ၊၊ သီုညးၜါလိၚ်ကၠောန်ကာညးတုဲ မဂွံဂျိုၚ်လမျီုရောၚ်၊၊ ပ္ဍဲသ္ၚိဂှ်တုန် ထးထဝ်မွဲ မဒှ်ပရိဘောဂသေဌဳဇၞော်တုဲ မစွံလဝ်အကြာဘာဇန ဗၞတ်အဓါန်မလအ်မဟွံရပ်စပ် မကၠိခ္ဍက်ဒၟံၚ်ဂှ်နွံ၊၊ ဒ ဒှ်မဒှ်ထးထဝ်ဂှ်လေဝ် ညးၜါဟွံတီ၊၊ ညးဗၞိက်လုလန်ဂှ်တုန် “ရာန်လီု ရာန်လီု” ကော်သွံတုဲ ဂေၚၚ် အာရ၊၊
စိုပ်တရၚ်သ္ၚိဂှ် သၟတ်ဗြဴဂှ်ညာတ်တၠလီု “ဗဴဇု၊ ရာန်လီုမွဲကဵုအဲညိ” သၟတ်ဗြဴဂှ်ဂး၊၊ “ယွံစဴ၊ သာ်ဒဒိုက်ပိုဲဝွံ မူဝတ္ထုမွဲမွဲကဵုတုဲ သ္ဂောအ်လီုညးဂှ်ရော” ဗဴဂး၊၊ “ယွံဗဴဇု၊ ထးပိုဲမွဲနွံ ဍေံလေဝ်ဟွံဥပကာကဵုပိုဲ ထးဂှ် သ္ဍိုက်ကဵုၚုဟ်လီုရ ဟွံဂွံဟာဗဴဇု” သၟတ်ဗြဴဂှ်ဂးတုဲ သမ္ဘာသေဌဳကော်တၠလီု လးသၞာဂ္ဇအ်တုဲ “ထးဝွံ တၠ အဲယိုက်ကေတ်တုဲ လီုဆမတန် တၠအဲကဵုကုဒေံတၠအဲညိ” ဗဴဇုဂှ်ဂး၊၊ ညးဗၞိက်ရပ်ထးဂှ် သ္ၚဳမွဲတုဲ ထဝ် ရောၚ်ဒှ်ချပ်တုဲ ဂတးကၠေံ ပ္ဍဲစနိန်ထး ရိတ်မွဲကဵုမုဟ်တနိၚ် တီဒဒှ်ထဝ်တုဲ “ညးၜါဗဴကဵုစဴ သဒိုဟ် လောန်သန်သွံ၊ လီုလေဝ်အဲဟွံကဵု ထးလေဝ်အဲသကေတ်ဏာသၟးရ” ချပ်တုဲ၊ “မူၚုဟ်မနွံရော၊ လပါ်မးကီုလေဝ်ဟွံတန်” ဂးတုဲ ထေဝ်ကၠေံထးဂှ်ပ္ဍဲတိတုဲ သီုပၞတ်ဒလိုက်က္တဵုအာရ၊၊
သြော်သဗာန်တြဴမွဲဂှ် ညးမွဲလုပ်သွံကၠာတုဲ တိတ်အာတုဲ ညးမွဲသ္အာၚ်တေံ လုပ်သွံပၠန်ဂွံဟေၚ်၊၊ ဟိုတ်ဂှ်ရ ဗော်ဓိသတ်လုပ်သြော်ဂှ် ကော်သွံအာ “ယွံဒေံဗြဴတအ် ရာန်လီုအိုတ်ဟာ ရာန်လီုအိုတ်ဟာ” သာ်ဝွံ ကော်သွံအာ စိုပ်တရၚ်သ္ၚိညးၜါဗဴကဵုစဴဂှ်ရ၊၊ သၟတ်ဗြဴဝုတ်စံၚ်ကဵုဗဴရာန်လီုပၠန်တုန်၊ “ယွံစဴ၊ ညးဗၞိက်မကၠုၚ် ကၠာတေံမွဲလေဝ် ထေဝ်ကၠေံထးပ္ဍဲတိတုဲ သီုမပၞတ်မဒလိုက်က္တဵုအာတုဲရ၊ လၟုဟ်မူဝတ္ထုမွဲသ္အာၚ်နွံ သ္ဂောအ် ရာန်လီုဂှ်ပၠန်ရောစဴ” သမ္ဘာသေဌဳဂး၊၊ “ယွံဗဴဇု၊ ညးဗၞိက်ကၠာဂှ် သ္အဵုသ္အာ်မြဟ်စာရောၚ်၊၊ ညးဗၞိက်လၟုဟ်ဝွံ သ္ၚိတ်ဇြဍိုန်ဍောတ်ဒၟံၚ်လောန်သန်၊ တန်ဂိုၚ်ကေတ်ထးပိုဲကီုဟွံတီ” သၟတ်ဗြဴဂှ်ဂး၊၊ “ဒှ်ရသာ်ဂှ် ကော်ရ စဴ” ဗဴဂှ်ဂးတုဲ ကော်ဗောဓိသတ်လုပ်ကၠုၚ်သ္ၚိ လးသၞာဂ္ဇအ်တုဲ သမ္ဘာသေဌဳဗဒုၚ်ကဵုထး ဗောဓိသတ် ညာတ်တုဲ တီဒဒှ်ထးထဝ်တုဲ “ထးဝွံ ၚုဟ်မွဲလက်ဟေၚ်၊ ဗၞိက်မတန်ကဵုထးဟွံမွဲ” ဗောဓိသတ်ဂး၊၊ “ယွံတၠအဲ၊ ညးဗၞိက်ကၠုၚ်ကၠာတေံမွဲ ထးဝွံ လပါ်မးကီုဟွံတန်ဂးတုဲ ထေဝ်ထောံပ္ဍဲတိတုဲ မဒလိုက် က္တဵုအာရ၊၊ ကြဳဇှ်ပိုန်ကုသဵုတၠအဲ ထးဝွံဒှ်အာထဝ်ရောၚ်သဒှ်ရ၊၊ ပိုဲမကြိုက်စိုတ်ကဵုတၠအဲရ၊ လီုညိညဆ မကြိုက်စိုတ်ဂှ် ကဵုကုပိုဲရ၊၊ ယိုက်ကေတ်ထးဝွံတုဲ အာဂွံရ” သမ္ဘာသေဌဳဂး၊၊ ဗောဓိသတ်တုန် ပ္ဍဲခဏဂှ် ၚုဟ်ဗၞိက်ပၚုဟ်တုဲလေဝ် မသုန်ကၠံကသာပ် ဗၞိက်မသှ်ေဏီလေဝ် ကသာပ်ထဝ်သီုထိုၚ်ကဵုတုဲ ထဝ်ထိုၚ် ကသာပ်ဂှ် ဒစာံကသာပ် ဗောဓိသတ်အာတ်ကေတ်ပၠန်တုဲ တိတ်ကၠုၚ်ဗွဲပြဟ်ဟေၚ်၊၊ ကၠုၚ်စိုပ်သြၚ် ကြုၚ်ဂှ် ဒစာံကသာပ် ကဵုကုဂဒိုအ်တုဲ ဍိုက်ဂၠုၚ်ရ၊၊
ညးဗၞိက်သမၠီုတေံကၠုၚ်တုန် ကလေၚ်ပၠန်သ္ၚိဂှ် “နၚ်ထးဂှ်ရ၊ လီုညိအဲကဵု ဟွံပတမော်ရ” ဍေံဂး၊၊ သေ ဌဳဗြဴမိၚ်တုဲ ဂြိုၚ်တုဲသ္ဂးရ၊ “ထးထဝ်ပိုဲဝွံ ၚုဟ်ထဝ်မွဲလက်မတန်ဂှ် လပါ်မးကီုမဟီု ညးဗၞိက်ဗဗွဲဓဝ်တေံ မွဲမကၠုၚ် ဒြပ်လ္ၚီဣတေံမကဵုကုပိုဲတုဲ ထးဂှ် ဣတေံဂွံဏာတုဲရ” သမ္ဘာသေဌဳဂး၊၊ ညးဗၞိက်သမၠီုဂှ် ဂွံ မိၚ်ဗက် “နူထးထဝ်ၚုဟ်မွဲလက် အဲမဒးဟုတ်အာသွံ၊ ညးဗၞိက်တေံမပၠေၚ်သေၚ်ဟာ” ဂးတုဲ ညံၚ်လ မဳကြက်တၟအ်မဇၞော်မဒေါမ်ဍိုက်ကီု ယဲပူမဟ်မဇၞော်က္တဵုဒှ်ရ၊၊ သှ်ပ္တဴသတိဟွံမာန်သ္ၚဳအာ ကသာပ်ကီု ဗၞိက် မတဴပ္ဍဲတဲကီု ပက်ဒြာတ်ထောံကၠေံတုဲ ပ္ဍဲတရၚ်သ္ၚိ ဗွိုက်လတက်သှ်ဗိုတ်ထောံကၠေံ ထဝ်ပသာပ္တုပ်ရိစၚိန် ဒြေပ်ဗက်လမာ်ဇိုၚ်ဗောဓိသတ်ရ၊၊
စိုပ်သြၚ်ကြုၚ် စၟဳညာတ်ဗောဓိသတ်ပ္ဍဲဂၠုၚ်ရ၊၊ “ဟာဲဂဒိုအ်၊ ပလံၚ်နၚ်ဂၠုၚ်ညိ” ကော်ဟီု၊ “လ္ပပၠန်ဂတး လ္ပပၠန်ဂတး” ဂးတုဲ ဗောဓိသတ်ဆေဝ်ဒဝ်ကၠေံဂဒိုအ်ရ၊၊ ညးဗၞိက်သမၠီုဂှ် သီုမညာတ်ဒၟံၚ်ဗောဓိသတ်မ အာ ယဲပူမဟ်ဇၞော်ဒြဟတ် ဂြိုဟ်ကတဴ ဒတိုဟ်ပတ်ပတ် ဆီညံၚ်လှောၚ်သြာၚ် မဒွအ်ဂမ္တဴသာန်တ္ၚဲ ညံၚ်တိဒြၚ်ပအက်ကီု သြိုဟ်ဒကးအာၜါလွး ဒက်လဗိုန်ဝဲပ္ဍဲဗောဓိသတ်တုဲ ဒၞာဲဂှ်ဟေၚ်အိုတ်အာလမျီုရ၊၊ ဝွံဒဒှ်တၞံရ၊ ဒေဝဒတ်မဒက်ဝဲ ပ္ဍဲဗောဓိသတ်ရ၊၊ ဗောဓိသတ်တုန် စဴစိုပ်သ္ၚိ လၟေၚ်အာယုက် ကုသဵုမဂၠိုၚ် ပ္တုဲဒါန်သဳလသ္ပတုဲ တိုၚ်ပွဇကုဟေၚ် စဴအာဘဝပလိုက်ရ၊၊ ဒှ်ကျာ်တုဲ ဂလာန်မြဴဝွံသ္ဂးရ၊၊
“ယွံခမဳတအ်၊ ပ္ဍဲသာသနာဝွံ သောတာပတ္တိမဂ် မစၟတ်ကဵုဓဝ်လောကုတ္တဵုအိုတ်သီုဝွံ ဖျေံကၠေံလွဳ ဟွံ ကလိဂွံတုဲဂှ် လုကဴအဓါန်မဂၠိၚ်သ္ၚောဲဟေၚ် မဒးစံၚ်တူဒၟံၚ်ရ၊၊ မူပမာမတုပ်ရော၊ ညံၚ်ညးဗၞိက်သမၠီု မ ဟိမုသေရိဝ မဂွံထးထဝ်ၚုဟ်မွဲလက်တုဲ ဖျေံထောံကၠေံလွဳ မဟွံဂွံဂိုၚ်လဝ် ဟုတ်အာနူထးထဝ်ဂှ်တုဲ ရဴမ သ္ၚောံစံၚ်တူဒၟံၚ်ကီု၊၊ ညံၚ်သာ်ဂှ်ကီုရ မြာဂွံသာသနာတုဲ ဖျေံကၠေံလွဳ အရိယမဂ်မတုပ်ထးထဝ် ဟွံဂိုၚ် လဝ် ဟုတ်အာနူအရိယမဂ်တုဲ အဓါန်မဂၠိၚ်သ္ၚောဲဟေၚ် မဒးသ္ၚောံစံၚ်တူဒၟံၚ်ရသွံ၊၊ ယဝ်ရကမြဴလွဳ ညံၚ် ညးဗၞိက်တၠပညာ မမြာဂွံထးထဝ်ၚုဟ်ထဝ်မွဲလက်ကီု အနဂ္ဃလောကုတ္တဵုဒစိတ်ပြကာ ခမဳမြာဂွံရ” ကျာ် တြဲဂး၊၊
လ္အိတ်ဒေသနာဂှ် ခမဳမဖျေံကၠေံလွဳဂှ် ဂွံဒှ်အရှန်ရ၊၊ ညးဗၞိက်သမၠီုဂှ် ကၠုၚ်ဒှ်ဒေဝဒတ်ရ၊၊ ညးဗၞိက်တၠ ပညာဂှ် မဒှ်ကျာ်ရ၊၊ တၠပညာတအ်မိၚ်ဇာတ်ဝွံတုဲ ညးဗၞိက်သမၠီုမဒေပ်စၞာဲ ထးညးမတန်ၚုဟ်မွဲလက် လေဝ်တီ ဆဗၞတ်လပါ်မးကီုဟွံတန် ဟီုပစရဵုတုဲ ထေဝ်ထောံပ္ဍဲတိ၊ သၟးမသၟိက်ယိုက်ကေတ်ဒြပ်ညးမ ချပ်၊၊ ကသပ်ဝွံစိုတ်ဝွံရ မစံၚ်တူဂမ္တဴဂြိုဟ် မဗပါ်သြိုဟ် မပ္တိတ်ဆီကအ် မပအိုတ်လမျီုရ၊၊ ညးဗၞိက် တၠပညာ မလေပ်ဒေပ်စိုတ်တမ္ၚူတုန် ဒဒှ်ထဝ်ၜိုန်တၠဒြပ်ဟွံတီကီု ထးဝွံ ၚုဟ်ထဝ်မွဲလက်ဟေၚ်မတန် ဒြပ်ပ္ဍဲတဲလ္ၚီကီုမနွံ မဟီုကဵုတမ္ၚူတုဲ “ဆမသၟိက်ကဵုကုပိုဲ ထးဝွံကေတ်ဏာရ” ၜိုန်တၠဒြပ်ဂး၊ ကဵုဒြပ် လေဝ်လ္ၚီ ထဝ်ပသာလေဝ်ကီု သီုကဵုထိုၚ်ဟေၚ်ကဵုတုဲ မဂိုၚ်ဏာဒြပ်ညး၊၊ စိုတ်ဝွံပွဝွံရ မလလဴဗဝက် မ ပလံၚ်ဗစိုပ်သ္ၚိ မဂွံအဵုဇိုတ် ဗဂေါဝ်မုက်ကောန်သမ္ဘာ တွဳဝါရအလုံသ္ၚိ၊၊ တၟံၜါစွံဝွံတီတုဲ ပဋိပတ်လွေဟ် စၞာဲလေဝ် စှ်ေပဲါညံၚ်မဗၠးညိ၊ ပဋိပတ်စၟတ်တမ္ၚူလေဝ် မှတ်ဂၠာဲသ္ၚဳဂိုၚ်ဒေပ်လဝ် ညံၚ်မဗိုန်ညိမိဂ္ဂး၊၊
